Өрөспүүбүлүкэҕэ доруобуйаларынан хааччахтаах дьон уопсастыбатын көҕүлээһининэн көрбөттөр кулууптарыгар Күһүҥҥү калейдоскоп диэн көхтөөх тэрээһин буолан ааста. Тэрээһини иилээн-саҕалаан уопсастыба култууратын исписэлииһэ Николай Суздалов бэрт сэргэхтик ыытта.
Сэргэх тэрээһиҥҥэ Дьокуускайтан, Горнайтан, Тааттаттан, Чурапчыттан, Намтан, Хаҥаластан, Бүлүүттэн, Үөһээ Бүлүүттэн, Сунтаартан кыттыыны ыллылар. Уопсайа 17 кыттааччы күһүҥҥү темаҕа күрэс былдьастылар.
Күрэҕи дьүүллүүр сүбэ сыаналаата. Дьүүллүүр сүбэҕэ уопсастыба бэрэссэдээтэлэ Ирина Лебедева, бэрэссэдээтэли солбуйааччы Наталья Прокопьева, Көрбөттөр уопсастыбаларын исписэлииһэ Алена Иванова үлэлээтилэр.
Авангард модаҕа Чурапчыттан Саргылана Хоютанова, Намтан Александра Соловьева, Хаҥаластан Мария Соломонова бастыҥнарынан ааттаннылар.
Дьиктилээх оҕуруот күрэххэ Хаҥаластан Мария Соломонова бастакы, Хаҥаластан Людмила Потапова иккис, Бүлүүттэн Алексей Прокопьев үһүс миэстэ буоллулар.
Карвинг күрэххэ Намтан Александра Соловьева кыайыы өрөгөйдөннө. Тааттаттан Ирина Шепелева, Сунтаартан Вадим иккис-үһүс буолан, үөрүүлэрэ үксээтэ.
Ону таһынан күһүҥҥү оҕуруот аһыгар быыстапка-дьаарбаҥка буолла, атыы-тутуу ыытыллан кыттааччылар сүргэлэрэ көтөҕүлүннэ.
Ааптар: Ньургуйаана Скрябина
Добавить комментарий